സൈബർ സുരക്ഷാ ക്വിസ്
കൈറ്റ് സൈബർ സുരക്ഷാ പ്രോട്ടോകോൾ 2026 അടിസ്ഥാനമാക്കിയുള്ള മത്സരം.
🏆 ടോപ് സ്കോറർമാർ (Leaderboard)
ചോദ്യം ഇവിടെ വരും
ക്വിസ് പൂർത്തിയായി! 🎉
നിങ്ങളുടെ സ്കോർ:
ഡാറ്റ സമർപ്പിക്കുന്നു...
Activities
📅 20 June 2026
ലിറ്റിൽ കൈറ്റ്സിൽ ഇനി സ്റ്റുഡന്റ് മെന്റർമാരും
സംസ്ഥാനത്തെ പൊതുവിദ്യാലയങ്ങളിൽ പ്രവർത്തിക്കുന്ന 'ലിറ്റിൽ കൈറ്റ്സ്' ഐ.ടി ക്ലബ്ബുകളുടെ പ്രവർത്തനം കൂടുതൽ ജനകീയവും ഫലപ്രദവുമാക്കാൻ ലക്ഷ്യമിട്ട് പൊതുവിദ്യാഭ്യാസ വകുപ്പിലെ കൈറ്റ് പുതിയ 'സ്റ്റുഡന്റ് മെന്റർ' പദ്ധതിക്ക് തുടക്കം കുറിച്ചു. ഇതിന്റെ ഭാഗമായി കാസർകോട് ജില്ലയിലെ 320 സ്റ്റുഡന്റ് മെന്റർമാർക്ക് കൈറ്റ് പരിശീലനം നൽകി. നിലവിൽ ജില്ലയിലെ 123 സ്കൂൾ യൂണിറ്റുകളിലായി 12,066 കുട്ടികളാണ് ലിറ്റിൽ കൈറ്റ്സിൽ അംഗങ്ങളായിട്ടുള്ളത്. ജില്ലയിലെ 246 അധ്യാപകർ ഇതിനകം തന്നെ കൈറ്റ് മെന്റർമാരായി പ്രവർത്തിക്കുന്നുണ്ട്.
കേവലം സാങ്കേതികവിദ്യ കൈകാര്യം ചെയ്യുന്നതിനപ്പുറം, കുട്ടികളിൽ സഹാനുഭൂതിയും വിനിമയ പാടവവും വളർത്തിയെടുക്കുക എന്നതാണ് ഈ ദൗത്യത്തിന്റെ പ്രധാന ലക്ഷ്യമെന്ന് ശിൽപശാലയിൽ ഓൺലൈനായി സംവദിച്ച കൈറ്റ് സി.ഇ.ഓ കെ. അൻവർ സാദത്ത് വ്യക്തമാക്കി. ലിറ്റിൽ കൈറ്റ്സ് യൂണിറ്റിലെ പ്രവർത്തന മികവ്, നേതൃപാടവം, സഹജീവികളോടുള്ള താല്പര്യം, ആശയവിനിമയ ശേഷി, സാങ്കേതിക പരിജ്ഞാനം എന്നിവയുടെ അടിസ്ഥാനത്തിൽ ഒമ്പത്, പത്ത് ക്ലാസുകളിലെ അംഗങ്ങളിൽ നിന്നാണ് സ്റ്റുഡന്റ് മെന്റർമാരെ തിരഞ്ഞെടുത്തത്. പത്ത് കുട്ടികൾക്ക് ഒരു വിദ്യാർത്ഥി എന്ന നിലയിൽ ജില്ലയിലെ 123 യൂണിറ്റുകളിൽ നിന്നായി 410 'സ്റ്റുഡന്റ് മെന്റർമാരെ'യാണ് ആദ്യഘട്ടത്തിൽ തിരഞ്ഞെടുത്തത്. അംഗസംഖ്യയ്ക്ക് അനുസൃതമായി ഓരോ സ്കൂളിലും 2 മുതൽ 4 വരെ മെന്റർമാരുണ്ടാകും.
തങ്ങളുടെ ഗ്രൂപ്പിലുള്ള പത്ത് കുട്ടികൾക്കും ഐ.ടി ഉൾപ്പെടെയുള്ള പാഠഭാഗങ്ങൾ കൃത്യമായി മനസ്സിലാകുന്നുണ്ടെന്ന് ഉറപ്പുവരുത്തുക, ക്ലാസുകളിൽ അധ്യാപകരെ സഹായിക്കുക, ക്ലബ്ബിന്റെ പൊതുപ്രവർത്തനങ്ങൾക്ക് നേതൃത്വം നൽകുക എന്നിവയാണ് ഇവരുടെ പ്രധാന ചുമതലകൾ. കൂടാതെ, ഡിജിറ്റൽ ലഭ്യത ഉറപ്പാക്കുന്നതിന്റെ ഭാഗമായി വീടുകളിൽ ലാപ്ടോപ്പോ സ്മാർട്ട്ഫോണോ ഇല്ലാത്ത കുട്ടികളെ കണ്ടെത്തി അവർക്ക് സ്കൂൾ ലാബുകളിൽ പ്രത്യേക സൗകര്യം ഒരുക്കാനും ഈ സ്റ്റുഡന്റ് മെന്റർമാർ മുൻകൈയെടുക്കും.
📅 06 June 2026
കേടായ ലാപ്ടോപ്പുകൾക്ക് പുതുജീവൻ നൽകി കൈറ്റ് കാസർഗോഡ് ഡി.ആർ.സി
വിദ്യാലയങ്ങളിലെ കേടായ ഐ.ടി ഉപകരണങ്ങൾ അറ്റകുറ്റപ്പണികൾ നടത്തി പുനരുപയോഗിക്കുന്നതിന്റെ ഭാഗമായി കൈറ്റ് കാസർഗോഡ് ഡി.ആർ.സിയുടെ നേതൃത്വത്തിൽ മറ്റൊരു മികച്ച പ്രവർത്തനം കൂടി പൂർത്തിയാക്കി. ലാപ്ടോപ്പുകളുടെ ഹിൻജ് തകരാറിലായതിനെ തുടർന്ന് തുറക്കാനോ ഉപയോഗിക്കാനോ സാധിക്കാത്ത അവസ്ഥയിലായിരുന്ന ഇരുപതോളം ലാപ്ടോപ്പുകളാണ് ഈ ഘട്ടത്തിൽ അറ്റകുറ്റപ്പണി നടത്തി പ്രവർത്തനസജ്ജമാക്കിയത്. ഇതോടെ ഉപയോഗശൂന്യമായി കിടന്നിരുന്ന ഈ ഉപകരണങ്ങൾ വീണ്ടും കുട്ടികളുടെ പഠനത്തിനായി ലഭ്യമായി.
ഡി.ആർ.സിയിൽ വെച്ച് ഈ ലാപ്ടോപ്പുകൾ പൂർണ്ണമായും അഴിച്ചെടുത്ത്, തകരാറുകൾ സൂക്ഷ്മമായി പരിശോധിച്ച് പരിഹരിക്കുകയായിരുന്നു. ഉപയോഗശൂന്യമായി ഇ-മാലിന്യമായി മാറുമായിരുന്ന ലക്ഷക്കണക്കിന് രൂപയുടെ ഉപകരണങ്ങളെയാണ് ഇതിലൂടെ തിരികെ ഉപയോഗപ്രദമാക്കിയത്. പുതിയ ഉപകരണങ്ങൾ വാങ്ങുന്നതിനുള്ള വലിയ സാമ്പത്തിക ചെലവ് കുറയ്ക്കാനും പരിസ്ഥിതി സംരക്ഷണത്തിനും ഈ ഇടപെടൽ വലിയ രീതിയിൽ സഹായകമായി.
അറ്റകുറ്റപ്പണികൾ പൂർത്തിയാക്കി മികച്ച പ്രവർത്തനക്ഷമത ഉറപ്പുവരുത്തിയ ശേഷം ഇവ തിരികെ അതത് സ്കൂളുകളിലേക്ക് തന്നെ ഐ.ടി പഠനത്തിനായി കൈമാറി. ഹൈടെക് ക്ലാസ് മുറികളിലെ ഐ.ടി അധിഷ്ഠിത പ്രവർത്തനങ്ങൾക്കും കുട്ടികളുടെ കമ്പ്യൂട്ടർ പഠനത്തിനും ഈ ലാപ്ടോപ്പുകൾ സ്കൂളുകൾക്ക് വലിയ രീതിയിൽ പ്രയോജനപ്പെടും.
📅 7 April 2026
ലിറ്റിൽ കൈറ്റ്സ് ജില്ലാ റോബോട്ടിക് മേളയിൽ ഉദുമ ജി.എച്ച്.എസ്.എസ്. ജേതാക്കൾ
വിദ്യാനഗർ അസാപ് കമ്മ്യൂണിറ്റി സ്കിൽ പാർക്കിൽ കൈറ്റ്, എൽ.ബി.എസ്. എൻജിനീയറിങ് കോളേജ്, ഓപ്പൺ മൈൻഡ് എന്നിവയുടെ സഹകരണത്തോടെ നടത്തിയ ജില്ലാതല ലിറ്റിൽ കൈറ്റ്സ് റോബോട്ടിക് മേളയിൽ ഉദുമ ജി.എച്ച്.എസ്.എസ്. ജേതാക്കളായി. കക്കാട്ട് ജി.എച്ച്.എസ്.എസ്. രണ്ടാം സ്ഥാനവും കൊളത്തൂർ ജി.എച്ച്.എസ്.എസ്. മൂന്നാം സ്ഥാനവും കരസ്ഥമാക്കി.
വിദ്യാർഥികളിൽ സാങ്കേതിക വിദ്യ പരിശീലിപ്പിക്കുന്നതിനും അവരുടെ വൈദഗ്ധ്യം പ്രോത്സാഹിപ്പിക്കുന്നതിനുമായി സംഘടിപ്പിച്ച മേളയിൽ സ്കൂൾ തല മികവുത്സവങ്ങളിൽ നിന്ന് തിരഞ്ഞെടുക്കപ്പെട്ട നൂറ്റിപ്പത്തോളം കുട്ടികൾ മാറ്റുരച്ചു. കൈറ്റ് സി.ഇ.ഒ. അൻവർ സാദത്ത് മേള ഉദ്ഘാടനം ചെയ്തു.
ആശയത്തിന്റെ പ്രസക്തി, പ്രൊഡക്ടിന്റെ പ്രവർത്തനക്ഷമത, കോഡിങ്ങിലുള്ള അറിവ് എന്നിവ വിലയിരുത്തിയാണ് എൽ.ബി.എസ്. ടീം വിജയികളെ കണ്ടെത്തിയത്. ആദ്യ മൂന്ന് സ്ഥാനക്കാർക്ക് യഥാക്രമം 5000, 3000, 1000 രൂപ വീതം കാഷ് അവാർഡും സർട്ടിഫിക്കറ്റും മെമന്റോയും സമ്മാനിച്ചു. വിവിധ കാറ്റഗറികളിൽ മികവ് തെളിയിച്ചവർക്കെല്ലാം സർട്ടിഫിക്കറ്റും മെമന്റോയും നൽകി. എൽ.ബി.എസ്. എൻജിനീയറിങ് കോളേജ് റിസർച്ച് ഡീൻ ഡോ. പി. പ്രമോദ് ചടങ്ങിൽ അധ്യക്ഷത വഹിച്ചു. നിതീഷ് നായക്, മുഹമ്മദ് സൈൻ, അബൂബക്കർ അഫ്നാൻ എന്നിവരടങ്ങിയ സംഘമാണ് മൂല്യനിർണ്ണയം നടത്തിയത്.
ഡയറ്റ് പ്രിൻസിപ്പൽ ഡോ. രഘുറാംഭട്ട് സമാപനസമ്മേളനം ഉദ്ഘാടനം ചെയ്തു. പി. സവിത, ടി.വി. മധുസൂദനൻ, എൻ. നന്ദികേശൻ, കെ. ശങ്കരൻ, ജംഷീദ് എന്നിവർ മത്സരാർഥികളുമായി സംവദിക്കുകയും സമ്മാനദാനം നിർവഹിക്കുകയും ചെയ്തു. വി. ഫാത്തിമത്ത് റിദ, കെ.പി. സഞ്ജയ് എന്നിവർ പരിപാടികൾക്ക് നേതൃത്വം നൽകി. വരും വർഷങ്ങളിലും ഇത്തരം നൂതനമായ പ്രവർത്തനങ്ങൾ സ്കൂൾ തലത്തിൽ വ്യാപിപ്പിക്കുമെന്ന് ഉറപ്പു നൽകിയാണ് വിദ്യാർത്ഥികൾ മേളയിൽ നിന്നും മടങ്ങിയത്.
📅 9 March 2026
'കൈറ്റ് ഹരിതവിദ്യാലയം 4.0' ഗ്രാൻഡ് ഫിനാലെ: ജില്ലയ്ക്ക് മികച്ച നേട്ടം
പൊതുവിദ്യാലയങ്ങളുടെ മികവുകൾ പങ്കുവയ്ക്കുന്നതിനായി കൈറ്റ് സംഘടിപ്പിച്ച രാജ്യത്തെ ഏക വിദ്യാഭ്യാസ റിയാലിറ്റി ഷോ ആയ കൈറ്റ് ഹരിതവിദ്യാലയം 4.0 ഗ്രാൻഡ് ഫിനാലെയിൽ ജില്ലയ്ക്ക് മികച്ച നേട്ടം. തിരുവനന്തപുരത്ത് വെച്ച് നടന്ന ചടങ്ങിൽ പൊതുവിദ്യാഭ്യാസ വകുപ്പ് മന്ത്രി വി. ശിവൻകുട്ടി അവാർഡുകൾ വിതരണം ചെയ്തു.
പ്രൈമറി വിഭാഗത്തിൽ നീലേശ്വരം ജി.എൽ.പി.എസ് സംസ്ഥാന തലത്തിൽ രണ്ടാം സ്ഥാനം നേടി ജില്ലയുടെ അഭിമാനമായി. ജില്ലയിലെ 'സന്തോഷ് വിദ്യാലയം' എന്നറിയപ്പെടുന്ന ഈ സ്കൂൾ അക്കാദമിക മികവിനൊപ്പം കലാ-സാഹിത്യ പരിപാടികൾക്കും വലിയ ഊന്നൽ നൽകുന്നു. സർഗ്ഗതാരം, കിളിക്കൊമ്പൽ, അക്ഷരക്കൂട്ട്, കണ്ടൽ കാട് സംരക്ഷണം, സ്വാശ്രയത്വ സംരംഭങ്ങൾ തുടങ്ങിയ പ്രവർത്തനങ്ങളാണ് സ്കൂളിനെ സംസ്ഥാനത്തിന് തന്നെ മാതൃകയാക്കുന്നത്. മികച്ച ഈ നേട്ടത്തിന് ശില്പവും 4.20 ലക്ഷം രൂപയുടെ ഐസിടി ഉപകരണങ്ങളുമാണ് വിദ്യാലയത്തിന് സമ്മാനമായി ലഭിച്ചത്.
ഹൈസ്കൂൾ വിഭാഗത്തിൽ ജി.എച്ച്.എസ്.എസ് ചായോത്ത് ജൂറിയുടെ സ്പെഷ്യൽ പരാമർശത്തിന് അർഹമായി. 'കായിക മികവിലൂടെ അക്കാദമിക മികവിലേക്ക്' എന്ന ആശയത്തെ മുൻനിർത്തി 25 ഓളം കായിക ഇനങ്ങളിലൂടെ വ്യത്യസ്തമായ രീതിയിൽ വിദ്യാർത്ഥികളെ വാർത്തെടുക്കുന്നതിനാണ് ഈ അംഗീകാരം. ശില്പവും 2.10 ലക്ഷം രൂപയുടെ ഐസിടി ഉപകരണങ്ങളുമാണ് സ്കൂളിന് ലഭിച്ചത്.
കൂടാതെ ജിയുപിഎസ് പുല്ലൂരിലെ ദേവന കൃഷ്ണൻ, പിടിഎംഎയുപി സ്കൂൾ ബദിയടുക്കയിലെ മുഹമ്മദ് സഫ്വാൻ എന്നിവർ ഷോയിലെ മികച്ച പ്രകടനത്തിനുള്ള ബെസ്റ്റ് പെർഫോർമർ അവാർഡിനും അർഹരായി. അവാർഡിനർഹരായവരെ കൈറ്റ് സി.ഇ.ഒ കെ. അൻവർ സാദത്ത് അഭിനന്ദിച്ചു.
📅 27 February 2026
സാങ്കേതിക വിസ്മയമൊരുക്കി സ്കൂൾതല 'ലിറ്റിൽ കൈറ്റ്സ്' മികവുത്സവം
കുട്ടികളിലെ സർഗ്ഗാത്മകതയും സാങ്കേതിക നൈപുണ്യവും വിളിച്ചോതുന്ന സ്കൂൾതല 'ലിറ്റിൽ കൈറ്റ്സ്' മികവുത്സവം ജില്ലയിൽ ആവേശകരമായി. 'മികവിന്റെ നേർക്കാഴ്ചകളുമായി ലിറ്റിൽ കൈറ്റ്സ്' എന്ന പ്രമേയത്തിൽ ഫെബ്രുവരി 26-ന് നടന്ന മേളയിൽ ജില്ലയിലെ 125 സെന്ററുകളിൽ നിന്നായി നിരവധി വിദ്യാർത്ഥികൾ പങ്കെടുത്തു. ആധുനിക സാങ്കേതികവിദ്യകളുടെ വലിയൊരു ലോകമാണ് വിദ്യാർത്ഥികൾ സ്കൂളുകളിൽ ഒരുക്കിയത്.
വിവിധങ്ങളായ എട്ട് മേഖലകൾക്കായി വ്യത്യസ്ത സ്റ്റാളുകളിലായാണ് പ്രദർശനങ്ങൾ ക്രമീകരിച്ചിരുന്നത്. കുട്ടികൾ സ്വയം നിർമ്മിച്ച ആനിമേഷൻ വീഡിയോകൾ പ്രദർശിപ്പിച്ച 'ആനിമേഷൻ സോൺ', റോബോട്ടിക്സിന്റെ അനന്തസാധ്യതകൾ പരിചയപ്പെടുത്തിയ 'റോബോട്ടിക് എക്സ്പെരിമെന്റ്', വിദ്യാർത്ഥികൾ തനിയെ വികസിപ്പിച്ചെടുത്ത കമ്പ്യൂട്ടർ ഗെയിമുകൾ കളിക്കാൻ ഒരുക്കിയ 'ഗെയിം കോർണർ' എന്നിവയായിരുന്നു പ്രധാന ആകർഷണങ്ങൾ.
ഇതിനുപുറമെ, നിത്യജീവിതത്തിൽ ഉപകാരപ്രദമായ വിവിധ ഇലക്ട്രോണിക് ഉപകരണങ്ങളുടെ പ്രവർത്തനം കുട്ടികൾ വിശദീകരിച്ചു നൽകി. പഴയകാല കമ്പ്യൂട്ടറുകൾ, ഹാർഡ് ഡിസ്കുകൾ, മറ്റ് സ്റ്റോറേജ് ഡിവൈസുകൾ തുടങ്ങിയ ഐ.ടി ഉപകരണങ്ങളുടെ പ്രദർശനം പുതിയ തലമുറയ്ക്ക് വിജ്ഞാനപ്രദമായി. ആധുനിക കാലത്തെ അനിവാര്യതയായ ആർട്ടിഫിഷ്യൽ ഇന്റലിജൻസിനെക്കുറിച്ച് (AI) പ്രത്യേക പരിശീലന ക്ലാസുകളും പ്രദർശനത്തോടൊപ്പം നടന്നു.
ജി.എച്ച്.എസ്.എസ് കാസർകോട്, ജി.വി.എച്ച്.എസ്.എസ് കാഞ്ഞങ്ങാട് ഉൾപ്പെടെയുള്ള സ്കൂളുകളിൽ നടന്ന മേളയിൽ ലിറ്റിൽ കൈറ്റ്സ് അംഗങ്ങൾ, അധ്യാപകർ, മറ്റ് വിദ്യാർത്ഥികൾ എന്നിവർക്കൊപ്പം രക്ഷിതാക്കളുടെയും സജീവ പങ്കാളിത്തം ശ്രദ്ധേയമായി.
സ്കൂൾ തലത്തിലുള്ള ഈ മികവുത്സവത്തിൽ മികച്ച പ്രകടനം കാഴ്ചവെച്ച ശ്രദ്ധേയമായ ടീമുകൾക്ക് അസാപ്പ് (ASAP) കമ്മ്യൂണിറ്റി സെന്ററിൽ വെച്ച് നടക്കുന്ന ജില്ലാ റോബോട്ടിക് ഫെസ്റ്റിൽ മത്സരിക്കാൻ അവസരം ലഭിക്കും.
📅 22 February 2026
ലോക സ്വതന്ത്ര സോഫ്റ്റ്വെയർ ഭൂപടത്തിൽ കേരളം; ജികോംപ്രിസിന്റെ തമിഴ് - കന്നട ഇന്റർഫേസുകൾ തയ്യാറാക്കി കൈറ്റ്
ലോക സ്വതന്ത്ര സോഫ്റ്റ്വെയർ ഭൂപടത്തിൽ കേരളത്തിന് അഭിമാന നേട്ടം. പ്രമുഖ സ്വതന്ത്ര വിദ്യാഭ്യാസ സോഫ്റ്റ്വെയറായ 'ജികോംപ്രിസിന്റെ' തമിഴ്, കന്നട ഭാഷാ ഇന്റർഫേസുകൾ കൈറ്റ് തയ്യാറാക്കി. കുട്ടികൾക്കായുള്ള നിരവധി പഠന പ്രവർത്തനങ്ങൾ അടങ്ങിയ ഈ സോഫ്റ്റ്വെയർ ഇനിമുതൽ ഈ പ്രാദേശിക ഭാഷകളിലും ലഭ്യമാകും.
പുതിയ ഭാഷാ അപ്ഡേറ്റിലൂടെ തമിഴ്, കന്നട മീഡിയം വിദ്യാർത്ഥികൾക്ക് ജികോംപ്രിസ് സോഫ്റ്റ്വെയർ അവരുടെ മാതൃഭാഷയിൽ തന്നെ കൂടുതൽ എളുപ്പത്തിൽ ഉപയോഗിക്കാൻ സാധിക്കും. ഇതിൽ കന്നഡ ഭാഷയിലേക്കുള്ള സംഭാവനകൾ നൽകിയത് കൈറ്റ് കസർഗോഡ് ആണ്. വിദ്യാഭ്യാസ രംഗത്തെ സ്വതന്ത്ര സോഫ്റ്റ്വെയർ ഉപയോഗത്തിലും വികസനത്തിലും കേരളം നടത്തുന്ന മുന്നേറ്റങ്ങളെ അടിവരയിടുന്നതാണ് കൈറ്റിന്റെ ഈ പുതിയ ഇടപെടൽ.
📅 22 February 2026
കൈറ്റിന്റെ 'കീ ടു എൻട്രൻസ്' പരിശീലനത്തിന് ജില്ലയിൽ തുടക്കമായി
സംസ്ഥാനത്തെ പൊതുവിദ്യാലയങ്ങളിലെ ഹയർ സെക്കൻഡറി, വൊക്കേഷണൽ ഹയർ സെക്കൻഡറി വിദ്യാർഥികൾക്കായി കൈറ്റ് ഒരുക്കുന്ന 'കീ ടു എൻട്രൻസ്' സംയോജിത പ്രത്യേക പരിശീലന പരിപാടിക്ക് ജില്ലയിൽ തുടക്കമായി. ജില്ലാതല ഉദ്ഘാടനം കാഞ്ഞങ്ങാട് നഗരസഭ മിനി കോൺഫറൻസ് ഹാളിൽ വെച്ച് നഗരസഭ ചെയർമാൻ വി.വി. രമേശൻ നിർവഹിച്ചു. കരിയർ ഗൈഡൻസ് സെൽ ജില്ലാ കോ-ഓർഡിനേറ്റർ കെ. മൈസൻ അധ്യക്ഷത വഹിച്ചു.
കൈറ്റ് ജില്ലാ കോ-ഓർഡിനേറ്റർ റോജി ജോസഫ് പദ്ധതി വിശദീകരിച്ചു. വിദ്യാഭ്യാസ ജില്ലാ കോ-ഓർഡിനേറ്റർമാരായ സി. പ്രവീൺകുമാർ, സി. മനോജ് കുമാർ, വി.എച്ച്.എസ്.ഇ കരിയർ മാസ്റ്റർ സമീർ പി. സിദ്ദീഖ് എന്നിവർ പ്രസംഗിച്ചു. കൈറ്റ് മാസ്റ്റർ ട്രെയിനർമാരായ എ.എൻ.കെ. ബാബു, പ്രവീൺ കുമാർ എന്നിവർ പരിശീലനത്തിന് നേതൃത്വം നൽകി.
കീം, നീറ്റ്, സിയുഇടി, സിഎ ഫൗണ്ടേഷൻ, പിഎസ്സി തുടങ്ങിയ വിവിധ മത്സര പരീക്ഷകളിൽ മികച്ച വിജയം ഉറപ്പാക്കാൻ വിദ്യാർഥികളെ പ്രാപ്തരാക്കുന്ന രീതിയിലാണ് 'കീ ടു എൻട്രൻസ്' പോർട്ടൽ രൂപകല്പന ചെയ്തിരിക്കുന്നത്. സയൻസ്, ഹ്യുമാനിറ്റീസ്, കൊമേഴ്സ് വിഷയങ്ങൾക്ക് ഇതിൽ പ്രത്യേക പഠനപദ്ധതികളുണ്ട്. www.entrance.kite.kerala.gov.in എന്ന പോർട്ടലിലൂടെ സ്കൂളിൽ നിന്ന് ലഭിക്കുന്ന ലോഗിൻ വിവരങ്ങൾ ഉപയോഗിച്ച് വിദ്യാർഥികൾക്ക് പ്രവേശിക്കാം. ഇതിനുപുറമെ കൈറ്റ് വിക്ടേഴ്സ് ചാനലിലൂടെയും യൂട്യൂബ് ചാനലിലൂടെയും ക്ലാസുകൾ ലഭ്യമാകും.
📅 17 January 2026
സിയ ഫാത്തിമയുടെ ചരിത്രപരമായ ഓൺലൈൻ പങ്കാളിത്തം
64-ാമത് സംസ്ഥാന സ്കൂൾ കലോത്സവ ചരിത്രത്തിൽ സമാനതകളില്ലാത്ത ഒരധ്യായം എഴുതിച്ചേർത്തുകൊണ്ട്, കാസർഗോഡ് പടന്ന എം.ആർ.വി ഹയർ സെക്കൻഡറി സ്കൂളിലെ സിയ ഫാത്തിമ വീട്ടിലിരുന്ന് ഓൺലൈനായി അറബിക് പോസ്റ്റർ രചനാ മത്സരത്തിൽ പങ്കെടുത്തു. വാസ്കുലൈറ്റിസ് രോഗബാധയെത്തുടർന്ന് ചികിത്സയിലായിരുന്ന സിയയ്ക്ക്, ബഹു. വിദ്യാഭ്യാസ മന്ത്രി വി. ശിവൻകുട്ടിയുടെ പ്രത്യേക ഉത്തരവിലൂടെയാണ് മത്സരിക്കാൻ അവസരമൊരുങ്ങിയത്. കൈറ്റ് സി.ഇ.ഒ ശ്രീ. കെ. അൻവർ സാദത്തിന്റെ പ്രത്യേക നിർദ്ദേശപ്രകാരമാണ് ഈ ചരിത്രദൗത്യത്തിനാവശ്യമായ സാങ്കേതിക പ്രവർത്തനങ്ങൾ ജില്ലാ ഘടകം ആരംഭിച്ചത്.
ഔദ്യോഗിക മേൽനോട്ടം
സിയയുടെ വസതിയിൽ സജ്ജീകരിച്ച പ്രത്യേക മത്സരവേദിയുടെ ഔദ്യോഗിക നിയന്ത്രണം വിദ്യാഭ്യാസ വകുപ്പ് ഉദ്യോഗസ്ഥർ നേരിട്ട് നിർവ്വഹിച്ചു. കാഞ്ഞങ്ങാട് ഡി.ഇ.ഒ ശ്രീ. രോഹിത് ആണ് ഇവിടെ സ്റ്റേജ് മാനേജരായി പ്രവർത്തിച്ചത്. ചെറുവത്തൂർ എ.ഇ.ഒ ശ്രീ. രമേശൻ മത്സരവുമായി ബന്ധപ്പെട്ട മറ്റ് ഔദ്യോഗിക നടപടിക്രമങ്ങൾ പൂർത്തിയാക്കി നൽകി.
സാങ്കേതിക സജ്ജീകരണങ്ങൾ
മത്സരത്തിന്റെ സുതാര്യതയും കൃത്യതയും ഉറപ്പുവരുത്തുന്നതിനായി വിപുലമായ സജ്ജീകരണങ്ങളാണ് ഒരുക്കിയത്. തൃശ്ശൂരിലെ കലോത്സവ വേദിയിലുള്ള വിധികർത്താക്കൾക്ക് തത്സമയം മത്സരം വീക്ഷിക്കുന്നതിനായി അത്യാധുനിക സംവിധാനങ്ങൾ ഉപയോഗിച്ചു:
- വീഡിയോ കോൺഫറൻസിങ്: കൈറ്റിന്റെ പ്രത്യേക വീഡിയോ കോൺഫറൻസിങ് ക്യാമറയും സൗണ്ട് സിസ്റ്റവും ഉപയോഗിച്ചാണ് ലൈവ് സ്ട്രീമിംഗ് നടത്തിയത്.
- ഡോക്യുമെന്റേഷൻ: കൈറ്റ് പദ്ധതിയുടെ ഭാഗമായി സ്കൂളിന് അനുവദിച്ചിട്ടുള്ള ഡി.എസ്.എൽ.ആർ ക്യാമറ ഉപയോഗിച്ച് മത്സരത്തിന്റെ മുഴുവൻ ദൃശ്യങ്ങളും റെക്കോർഡ് ചെയ്തു.
ഏകോപനം
കൈറ്റ് കാസർഗോഡ് ജില്ലാ കോർഡിനേറ്റർ ശ്രീ. റോജി മാസ്റ്റർ ഓൺലൈനായി പങ്കുചേരുകയും മുഴുവൻ സമയവും സാങ്കേതിക ടീമിന് ആവശ്യമായ മാർഗ്ഗനിർദ്ദേശങ്ങൾ നൽകുകയും ചെയ്തു. സിയയുടെ വസതിയിലെ സാങ്കേതിക ക്രമീകരണങ്ങൾ നിയന്ത്രിച്ചത് കൈറ്റ് മാസ്റ്റർ ട്രെയിനർ ശ്രീ. കെ. മിഥുൻ ആണ്. പ്രൈമറി ക്യാമറയുടെ നിയന്ത്രണം, ആവശ്യാനുസരണം ദൃശ്യങ്ങൾ ക്രമീകരിച്ച് വിധികർത്താക്കൾക്ക് ലഭ്യമാക്കൽ എന്നിവ ഇദ്ദേഹം നിർവ്വഹിച്ചു. ഇന്റർനെറ്റ് ക്രമീകരണങ്ങൾ, കണക്ഷനുകൾ, മറ്റ് അനുബന്ധ സജ്ജീകരണങ്ങൾ എന്നിവ ഒരുക്കുന്നതിന് കൈറ്റ് ടെക്നീഷ്യൻമാരായ ശ്രീ. ഷിധിൻ, ശ്രീ. വരുൺ എന്നിവർ നേതൃത്വം നൽകി.
ഫലം
വിദ്യാഭ്യാസ വകുപ്പിന്റെ കരുതലും കൈറ്റിന്റെ സാങ്കേതിക മികവും ഒത്തുചേർന്നപ്പോൾ, ആരോഗ്യപരമായ വെല്ലുവിളികൾക്കിടയിലും സിയ ഫാത്തിമ നിശ്ചിത സമയത്തിനുള്ളിൽ മത്സരം വിജയകരമായി പൂർത്തിയാക്കി, മത്സരഫലം വന്നപ്പോൾ എ ഗ്രേഡ് നേടുകയും ചെയ്തു. കലോത്സവ ചരിത്രത്തിൽ ഇതാദ്യമായാണ് ഒരു മത്സരാർത്ഥിക്ക് വേണ്ടി മാത്രമായി ഇത്തരമൊരു ഓൺലൈൻ സംവിധാനം ഒരുക്കുന്നത്.
വാർത്തകളിലൂടെ
📅 31 December 2025
കലോത്സവ കാഴ്ചകൾക്ക് ഡിജിറ്റൽ കയ്യൊപ്പ്: ചരിത്രമെഴുതി മൊഗ്രാൽ ലിറ്റിൽ കൈറ്റ്സ്
ജി.വി.എച്ച്.എസ്.എസ് മൊഗ്രാലിൽ അരങ്ങേറിയ കാസർഗോഡ് റവന്യൂ ജില്ലാ സ്കൂൾ കലോത്സവം കലയുടെ കേളികൊട്ട് മാത്രമല്ല, സാങ്കേതികവിദ്യയുടെ മികച്ച ഏകോപനത്തിന് കൂടി സാക്ഷ്യം വഹിച്ചു. കലോത്സവ ചരിത്രത്തിൽ തന്നെ വേറിട്ട മാതൃകയായി, 13 വേദികളിലായി നടന്ന ആയിരക്കണക്കിന് പ്രതിഭകളുടെ പ്രകടനങ്ങൾ ഒട്ടും ചോർന്നുപോകാതെ ഡിജിറ്റൽ കണ്ണുകളിലൂടെ പകർത്തിയത് മൊഗ്രാൽ സ്കൂളിലെ ലിറ്റിൽ കൈറ്റ്സ് യൂണിറ്റ് അംഗങ്ങളാണ്. കലയും സാങ്കേതികവിദ്യയും കൈകോർത്തപ്പോൾ അത് സംഘാടന മികവിന്റെ പുതിയൊരു അധ്യായമായി മാറി.
ഒരുക്കം: കൃത്യത, വ്യക്തത
കലോത്സവത്തിന് ദിവസങ്ങൾക്ക് മുൻപേ തന്നെ കുട്ടികൾ ഈ വലിയ ദൗത്യത്തിനായി തയ്യാറെടുപ്പ് തുടങ്ങിയിരുന്നു. വീഡിയോ റെക്കോർഡിംഗിന്റെ സാങ്കേതിക വശങ്ങൾ മനസ്സിലാക്കാൻ പ്രത്യേക ട്യൂട്ടോറിയലുകളും പരിശീലനങ്ങളും അവർക്ക് ലഭിച്ചു. ഓരോ ദിവസവും ആരംഭിച്ചത് 'മോണിംഗ് ബ്രീഫിംഗി'ലൂടെയായിരുന്നു. അന്നത്തെ ദിവസത്തെ വെല്ലുവിളികൾ എന്തൊക്കെയാകാം, എങ്ങനെ നേരിടാം എന്നതിനെക്കുറിച്ച് കൈറ്റ് മാസ്റ്റർ ട്രെയിനർമാരും ജില്ലാ കോർഡിനേറ്ററും കുട്ടികൾക്ക് വ്യക്തമായ ദിശാബോധം നൽകി.
ട്യൂട്ടോറിയൽ കാണാൻ ക്ലിക്ക് ചെയ്യൂ
മൂന്ന് നാളുകൾ, പതിമൂന്ന് വേദികൾ
സ്റ്റേജുകളിൽ വെളിച്ചം വീണപ്പോൾ, അതിന് സമാന്തരമായി ലാപ്ടോപ്പുകളും വെബ് ക്യാമറകളുമായി ലിറ്റിൽ കൈറ്റ്സ് അംഗങ്ങൾ സജ്ജരായിരുന്നു. കേവലം വീഡിയോ എടുക്കുക എന്നതിലുപരി, ഓരോ മത്സരാർത്ഥിയുടെയും ചെസ്റ്റ് നമ്പർ അടിസ്ഥാനമാക്കി, ശാസ്ത്രീയമായി ഫയലുകൾ നാമകരണം ചെയ്ത് ആർക്കൈവ് ചെയ്യുന്ന 'സിസ്റ്റമാറ്റിക് ഡോക്യുമെന്റേഷൻ' ആണ് അവർ നടപ്പിലാക്കിയത്.
കരുത്തായി പൂർവ്വവിദ്യാർത്ഥികളും
ഈ യജ്ഞത്തിൽ നിലവിലെ വിദ്യാർത്ഥികൾക്കൊപ്പം തോളോട് തോൾ ചേർന്ന് ലിറ്റിൽ കൈറ്റ്സ് പൂർവ്വവിദ്യാർത്ഥികളും എത്തിയത് കലോത്സവത്തിന് നവ്യാനുഭവമായി. അവരുടെ അനുഭവസമ്പത്ത് കുട്ടികൾക്ക് വലിയൊരു പിന്തുണയായിരുന്നു. സാങ്കേതിക തകരാറുകൾ ഒരു നിമിഷം പോലും റെക്കോർഡിംഗിനെ ബാധിക്കാതിരിക്കാൻ കൈറ്റ് ടെക്നീഷ്യന്മാരായ ഷിതിൻ, വരുൺ എന്നിവർ മൂന്ന് ദിവസവും മുഴുവൻ സമയവും പ്രവർത്തകരായി വേദികളിലുണ്ടായിരുന്നു.
ക്രൈസിസ് മാനേജ്മെന്റ്: വിരൽത്തുമ്പിലെ പരിഹാരങ്ങൾ: ഏതൊരു സാങ്കേതിക പ്രവർത്തനത്തിലും തടസ്സങ്ങൾ സ്വാഭാവികമാണ്. എന്നാൽ ഇവിടെ പ്രശ്നങ്ങളെക്കാൾ വേഗത്തിലായിരുന്നു പരിഹാരങ്ങൾ. പൂർവ്വവിദ്യാർത്ഥികളും ടെക്നിക്കൽ ടീമും അടങ്ങുന്ന വാട്സ്ആപ്പ് കൂട്ടായ്മ വഴി ഓരോ നിമിഷവും ആശയവിനിമയം നടന്നു. ഓഡിയോ തകരാറുകളോ, ഹാർഡ്വെയർ പ്രശ്നങ്ങളോ ശ്രദ്ധയിൽപ്പെട്ടാൽ നിമിഷങ്ങൾക്കകം അത് പരിഹരിക്കാൻ ഈ 'ക്രൈസിസ് മാനേജ്മെന്റ്' സംവിധാനത്തിന് സാധിച്ചു.
റെക്കോർഡിങ് പ്രവർത്തനത്തിൽ പങ്കെടുത്തവർ
| No. | Student Name | Class |
|---|---|---|
| 1 | Abdulla Ashab A | 10 E |
| 2 | Abdulla Lazim | 9 |
| 3 | Abdulla Nihal | 9 |
| 4 | Abdulla Shazan | 11 C |
| 5 | Abdulla Sizan | 9 C |
| 6 | Abdul Hadil | 9 J |
| 7 | Aboobacker Shaman A | 9 G |
| 8 | Afrooz Mohammed | 10 |
| 9 | Ahammed Rifshath | 8 F |
| 10 | Ahmad Sinan | 8 G |
| 11 | Ahyan Ahmed | 8 F / 10 C |
| 12 | Amna Fathima | 9 |
| 13 | Arush K | 9 H |
| 14 | Ayshath Ansheeda K.P | 8 D |
| 15 | Ayshath Shayna | 10 |
| 16 | Aysha Muhaza | 10 E |
| 17 | Azmina Nazrin | 10 F |
| 18 | Muhammed Bilal MP | 8 B |
| 19 | Fadllullah N.K | 9 |
| 20 | Fathima A | 10 E |
| 21 | Fathima Neha Nourin | 9 E |
| 22 | Fathimath Hiba | 10 E |
| 23 | Fathimath Shazin | 9 G |
| 24 | Fathimath Zulfa | 9 C |
| 25 | Fazal C.H | 8 D |
| 26 | Fazal Muhaz | 8 D |
| 27 | Fidha Amina | 10 C |
| 28 | Fidha Fathima H.A | 10 E |
| 29 | Hadhi Hameed U | 8 C |
| 30 | Hana Amina N | 8 C |
| 31 | Hasan Azmal | 9 |
| 32 | Hazza Fathima | 8 |
| 33 | Ihan Ahammed Siddique | 8 C |
| 34 | Jusaiba | 10 |
| 35 | Karthika | 8 C |
| 36 | Khadeejath Mahfooza M.K | 10 B |
| 37 | Maryam Azra A | 9 |
| 38 | Mishana Fathima | 10 B |
| 39 | Mohammed Ajmal Sinan K | 8 |
| 40 | Mohammed Afrooz | 9 D |
| 41 | Mohammed Ramil | 12 |
| 42 | Mohammed Rihan | 9 D |
| 43 | Mohammed Safwan | 8 E |
| 44 | Mohammed Sahal | 8 |
| 45 | Moideen Shamnad | 9 D |
| 46 | Muhaza Sherine | 10 |
| 47 | Muhammed Ziya Kota | 9 E |
| 48 | Nadha Fathima | 10 E |
| 49 | Nafeesa Shazmin | 8 C |
| 50 | Nafeesath Musheera | 10 E |
| 51 | Nafeesath Nuha | 10 F |
| 52 | Najah Nazneen S | 9 E |
| 53 | Nireeksha | 10 A |
| 54 | Sadia Nourin N.A | 10 F |
| 55 | Safiyath Mansoora | 9 F |
| 56 | Saif Abdulla C.S | 8 D |
| 57 | Saqib Riyas | 8 F |
| 58 | Shaik Abdulla Farood | 9 |
| 59 | Shamma Binth Shihab | 10 |
| 60 | Zaeem Iyaz | 9 |
| 61 | Zayan | 9 D |
ജി.വി.എച്ച്.എസ്.എസ് മൊഗ്രാലിലെ ലിറ്റിൽ കൈറ്റ്സ് അംഗങ്ങൾ നിർവ്വഹിച്ച ഈ ദൗത്യം കേവലമൊരു ഡോക്യുമെന്റേഷൻ മാത്രമല്ല, മറിച്ച് വരുംകാല കലോത്സവങ്ങൾക്ക് മാതൃകയാക്കാവുന്ന ഒരു പാഠപുസ്തകം കൂടിയാണ്. കലയെ സ്നേഹിക്കുന്ന മനസ്സും, സാങ്കേതികവിദ്യയെ മെരുക്കിയെടുക്കാനുള്ള കഴിവും ഒന്നിച്ചപ്പോൾ മൊഗ്രാൽ സ്കൂൾ മുറ്റത്ത് പിറന്നത് ചരിത്രമാണ്.
📅 22 December 2025
ലിറ്റിൽ കൈറ്റ്സ് മെന്റർമാർക്കായി അക്കൗണ്ടിംഗ്, സ്കൂൾ വിക്കി പരിശീലനം സംഘടിപ്പിച്ചു
ലിറ്റിൽ കൈറ്റ്സ് മെന്റർമാരായ അധ്യാപകർക്കായി ജി.എച്ച്.എസ്.എസ് ഹൊസ്ദുർഗിൽ വെച്ച് ഏകദിന പരിശീലനം സംഘടിപ്പിച്ചു. അക്കൗണ്ടിംഗ്, സ്കൂൾ വിക്കി എന്നീ വിഷയങ്ങളെ ആസ്പദമാക്കി നടന്ന പരിശീലനത്തിന് മാസ്റ്റർ ട്രെയിനർ ബാബു മാസ്റ്റർ നേതൃത്വം നൽകുകയും ആമുഖ ഭാഷണം നടത്തുകയും ചെയ്തു.
പരിശീലനത്തിന്റെ ആദ്യ സെഷനിൽ ലിറ്റിൽ കൈറ്റ്സ് എൽ.കെ.എം.എസ് (LKMS) വെബ് പോർട്ടലിലെ അക്കൗണ്ടിംഗ് വിഭാഗത്തെക്കുറിച്ച് മാസ്റ്റർ ട്രെയിനർ അഖില ടീച്ചർ ക്ലാസുകൾ നയിച്ചു. അക്കൗണ്ടിംഗുമായി ബന്ധപ്പെട്ട് അധ്യാപകർക്കുള്ള സംശയങ്ങൾ ദൂരീകരിക്കുന്നതിനും, പുതുതായി ചുമതലയേറ്റ മെന്റർമാർക്ക് പോർട്ടൽ പരിചയപ്പെടുത്തുന്നതിനും ഈ സെഷൻ സഹായകമായി.
തുടർന്ന് നടന്ന സ്കൂൾ വിക്കി പരിശീലനത്തിന് മാസ്റ്റർ ട്രെയിനർ മിഥുൻ മാസ്റ്റർ നേതൃത്വം നൽകി. സ്കൂൾ വിക്കിയുടെ ആമുഖം, പൊതുവായ ലേഔട്ട് ക്രമീകരണം, ഫോട്ടോ അപ്ലോഡിങ്ങ്, ലിറ്റിൽ കൈറ്റ്സ് പേജിന്റെയും മെയിൻ പേജിന്റെയും ക്രമീകരണം, ബാച്ച് അടിസ്ഥാനമാക്കിയുള്ള പ്രവർത്തനങ്ങൾ രേഖപ്പെടുത്തൽ, ഇൻഫോബോക്സ് നിർമ്മാണം എന്നിവ വിശദമായി ക്ലാസ്സിൽ പ്രതിപാദിച്ചു.
തുടർന്ന് അധ്യാപകർ തങ്ങളുടെ സ്കൂൾ പേജുകൾ അപ്ഡേറ്റ് ചെയ്യുന്നതിനുള്ള പ്രായോഗിക പ്രവർത്തനങ്ങളും (Practical Session) നടന്നു. വളരെ ഫലപ്രദവും പ്രയോജനകരവുമായ പരിശീലനമാണ് ലഭിച്ചതെന്ന് പങ്കെടുത്ത അധ്യാപകർ വിലയിരുത്തി.
പങ്കെടുത്ത അധ്യാപകരുടെ വിവരങ്ങൾ
| Sl. no | Name | PEN No. | School |
|---|---|---|---|
| 1 | Amitha D | 984985 | GHSS Patla |
| 2 | Farhana Muhammadali | 972592 | VPKHHM MRVHSS Padne |
| 3 | Soumya.C | 913029 | CHMKSHSS Perumbatta |
| 4 | Reshma Kayyprath Veeti | 878976 | CHMKS GHSS Perumbatta |
| 5 | Rajani.P | 698625 | GHSS Chayoth |
| 6 | Simna.K | 986952 | GVHSS Kanhangad |
| 7 | Soumya.k | 970014 | GHSS Parappa |
| 8 | Aswathi K.V | 987172 | SRMGHSS Ramnagery |
| 9 | Vineetha.E | 510073 | GFHS Marakkappu Kodappuram |
| 10 | SARITHA.M | 548972 | VPPMKPS GVHSS TRIKARPUR |
| 11 | Sreepriya.C.K | 692101 | GHSS Kundamkuzhy |
| 12 | Ramya.P.P. | 992140 | G.V.H.S.S. Mogral |
| 13 | Princy K | 818691 | Durga HSS Kanhangad |
| 14 | Smitha.P. | 610412 | G.H.S. Kanhirapoil |
| 15 | Sreekumar.P.V | 970160 | CHSS Chattanchal |
| 16 | Abdul Ishak.T | 297576 | PMSAPTSVHSS. Kaikottukadav |
| 17 | Sabin Jose | 1010208 | St. Jude's H.SS Vellarikundu |
| 18 | Shalini.V.K | 50022 | Mar Thoma HS for Deaf, Cherkala |
| 19 | Bindu MK | 785201 | GHSS Kakkat |
📅 22 December 2025
'എന്റെ സ്കൂൾ എന്റെ അഭിമാനം' - റീൽസ് മത്സരത്തിൽ ജില്ലയ്ക്ക് മികച്ച വിജയം
കേരള ഇൻഫ്രാസ്ട്രക്ചർ ആന്റ് ടെക്നോളജി ഫോർ എഡ്യൂക്കേഷൻ (കൈറ്റ്) സംസ്ഥാനത്തെ പൊതു വിദ്യാലയങ്ങൾക്ക് വേണ്ടി നടത്തിയ 'എന്റെ സ്കൂൾ എന്റെ അഭിമാനം' റീൽസ് നിർമ്മാണ മത്സരത്തിലെ ജില്ലയിലെ പുരസ്കാര ജേതാക്കൾക്കുള്ള അവാർഡുകൾ വിതരണം ചെയ്തു. പതിനാല് ജില്ലകളേയും ഉൾപ്പെടുത്തി നടന്ന ഓൺലൈൻ ചടങ്ങിലാണ് പൊതുവിദ്യാഭ്യാസ ഡയറക്ടർ ഉമേഷ് എൻ.എസ്.കെ. ഐ.എ.എസ്.ഉം കൈറ്റ് സി.ഇ.ഒ.കെ. അൻവർ സാദത്തും ചേർന്ന് സ്കൂളുകൾക്ക് അവാർഡുകൾ സമ്മാനിച്ചത്. വിജയികളായ 101 സ്കൂളുകളുടെ പട്ടികയിൽ ജില്ലയിൽ നിന്നും ഇടംപിടിച്ച ജി.എച്ച്.എസ്.എസ്. കുണ്ടംകുഴി, ദുർഗ്ഗ എച്. എസ്. എസ്. കാഞ്ഞങ്ങാട്, രാജാസ് എച്ച്.എസ്.എസ്. നീലേശ്വർ, ജി. എച്ച്. എസ്. എസ്. കുട്ടമത്ത്, ഗുരു ചന്തുപണിക്കർ സ്മാരക ജി.എച്ച്.എസ്. എസ്. എളമ്പച്ചി, പി.എം.എസ്.എ.പി.ടി.എസ് വി.എച്ച്.എസ്.എസ് കൈക്കോട്ടുകടവ്, ജി.വി.എച്ച്. എസ്.എസ്.കയ്യൂർ, ഗവ. എച്ച്. എസ്. തച്ചങ്ങാട്, ജി.എച്ച്.എസ്. കാഞ്ഞിരപ്പൊയിൽ, മാർതോമ എച്ച്.എസ്. ഫോർ ദ ഡെഫ് ചെർക്കള സ്കൂളുകളാണ് കൈറ്റ് ജില്ലാ കേന്ദ്രത്തിൽ വെച്ച് അവാർഡുകൾ ഏറ്റുവാങ്ങിയത്. കൈറ്റ് വിക്ടേഴ്സ് ചാനലിൽ ലൈവായി സംപ്രേഷണം ചെയ്ത ചടങ്ങിൽ ജില്ലയിലെ വിദ്യാർത്ഥികൾ ആശയവിനിമയം നടത്തി. ജില്ലാ കോ-ഓർഡിനേറ്റർ റോജി ജോസഫ് ചടങ്ങിൽ പങ്കെടുത്തു.
പൊതുവിദ്യാലയങ്ങളിലെ മികവുകൾ മറ്റ് വിദ്യാലയങ്ങളിലേയ്ക്ക് എത്തിക്കുന്നതിന്റെ ഭാഗമായി നടന്ന റീൽസ് മത്സരത്തിനെത്തുടർന്ന് കൈറ്റ് വിക്ടേഴ്സിന്റെ ആഭിമുഖ്യത്തിൽ 'ഹരിതവിദ്യാലയം' റിയാലിറ്റി ഷോ ഡിസംബർ അവസാനം മുതൽ സംപ്രേഷണം ചെയ്യുന്നതിനുള്ള ഒരുക്കങ്ങൾ പൂർത്തിയായി വരുന്നു. ഇതിലേയ്ക്ക് അപേക്ഷ നൽകേണ്ട തീയതി നവംബർ 20 വരെ ദീർഘിപ്പിച്ചിട്ടുണ്ട്. സ്കൂൾ മികവുകൾ സമൂഹ മധ്യത്തിൽ എത്തിക്കുന്നതിനുള്ള ഒരു അവസരമായി ഹരിതവിദ്യാലയം റിയാലിറ്റി ഷോ പ്രയോജനപ്പെടുത്തണമെന്ന് കൈറ്റ് സി.ഇ.ഒ. കെ. അൻവർ സാദത്ത് അറിയിച്ചു.
RESORCES
.----------------------------------------------------
.............................................................
Subscribe to:
Posts (Atom)